Saturday, August 8, 2009

4. വീണ്ടും സത്യവതി

ഗംഗാദേവി പോയതിന് ശേഷം, ശന്തനുമഹാരാജാവിന്റെ ജീവിതം പി.ബി.യില്‍ നിന്ന് പുറത്താക്കിയ അച്ചുതാന്ദന്‍ സഖാവിന്റെ പോലെയായി മാറി. മൊത്തത്തില്‍ ഒരു താല്പര്യക്കുറവ്!



ചര്യകളും ശീലങ്ങളും വരെ മാറിപ്പോയി.



ബ്രഹ്മമുഹൂര്‍ത്തതിലുണര്‍ന്ന് വാട്ടിയ രണ്ട് കോഴിമുട്ടയും ഒരു ഡവറ ഡേറ്റ്സ് മില്‍ക്കും കുടിക്കാറുള്ളതാണ്. വെള്ളേപ്പത്തിനും മുട്ടക്കറിക്കും പുറമേ, മട്ടണും മുരിങ്ങക്കായയും കൊണ്ടുണ്ടാക്കിയ 36 വിഭവങ്ങളടങ്ങിയ ബുഫേയാണ് ബ്രേക്ക് ഫാസ്റ്റിന്.



ഇപ്പോള്‍ ഒന്നും കഴിക്കില്ല. ചെമ്പാവരിയുടെ രണ്ടു കഷണം പുട്ട്. അല്ലെങ്കില്‍ മൂന്ന് ഇഡലി. ചിലപ്പോള്‍ നേന്ത്രപ്പഴം പുഴുങ്ങിയത് ഒരു കഷണം. മറ്റൊന്നിലും താല്പര്യമില്ല. ഉച്ചക്കും വൈകീട്ടും അതുപോലെ തന്നെ. പേരിന് എന്തെങ്കിലും.



പരിചാരകര്‍ ആരെങ്കിലും നിര്‍ബന്ധിച്ചാല്‍ മറുപടിയായി “എന്നിട്ടെന്തിനാ??” എന്ന ദൈന്യതയോടെയുള്ള ചോദ്യമാണ് മുഖത്ത്!



മാര്‍ഗരറ്റ് ഉപേക്ഷിച്ച് പോയ മെര്‍മാനെപ്പോലെ, ജീവിതം ഡ്രൈ ആയി പൊയ്പോകെ ചതുരംഗം കളിച്ച് കളിച്ച് ബോറടിച്ച മഹാരാജാവ് യമുനാനദീതീരത്തുള്ള വനപ്രദേശത്ത് നായാട്ടിനായി പോയി.



കൊട്ടാരം വക സൂവില്‍ നിന്ന് രാ‍ജകുടുംബാംഗങ്ങള്‍ക്ക് വേട്ടയാടി വിളയാടാന്‍ കൊണ്ടുവിട്ട കലമാന്‍ കുഞ്ഞുങ്ങള്‍ വളര്‍ന്ന് വലുതായി, നദിയില്‍ വെള്ളം കുടിക്കാന്‍ വരുന്നതും, കാനന ഛായയില്‍ കിടന്ന് അവ ചാടി കളിക്കുന്നതും ചൂളം വിളിക്കും പോലെയൊരു പ്രത്യേകതരം ശബ്ദമുണ്ടാക്കുന്നതുമെല്ലാം മന്ത്രി ശ്രേഷ്ഠന്‍ അമ്പ് പെരുന്നാളിന്റെ അന്ന് രാത്രി പറഞ്ഞിരുന്നു.



രഥത്തിന്റെ വീല്‍ ബിയറിങ്ങില്‍ നിന്ന് കയ്യില്‍ പറ്റിയ ഗ്രീസ് സോപ്പിട്ട് കഴുകിക്കളയാന്‍ യമുനാ നദിയില്‍ കുനിഞ്ഞതായിരുന്നു മഹാരാജാവ്.



പെട്ടെന്നാണത് ശ്രദ്ധിച്ചത്.



കാറ്റില്‍ എവിടെ നിന്നോ കസ്തൂരി ഗന്ധം ഒഴുകിവരുന്നു.



കസ്തൂരി ഗന്ധത്തിന്റെ ഉത്ഭവം അന്വേഷിച്ച് നടന്ന ശന്തനു മഹാരാജാവ്



പൂനം ദാസ് ഗുപ്തയേ പോലെ ശാലീനത തുളുമ്പി നില്‍ക്കുന്ന ഒരു യുവതി, കടത്ത് വഞ്ചി തുഴഞ്ഞ് പോകുന്നത് ശ്രദ്ധിച്ചു.



അത് സത്യവതിയായിരുന്നു.(അതേ, നമ്മുടെ പഴേ സത്യവതി. കസ്തൂരി ഗന്ധം വരം കിട്ടിയതാണല്ലോ!)



തപോബലം കൊണ്ട് ഫുള്‍ കണ്ട്രോളില്‍ നടക്കുന്ന പരാശരമുനിക്ക് പോലും കണ്ട്രോള്‍ പോയി, പിന്നല്ലേ... ശാന്തനു!



ശന്തനു മഹാരാജാവ് സത്യവതിയെ കൈ കൊട്ടി വിളിച്ച്, വഞ്ചി കരക്കടുപ്പിച്ച്, കാര്യം പറഞ്ഞു.



സത്യവതി, ശന്തനുവിന്റെ കണ്ണുകളിലേക്ക് നോക്കി.



ഒരു പുരുഷന്‍ തന്നെ സ്നേഹിക്കുന്നെന്നും വിവാഹം കഴിക്കാന്‍ ആഗ്രഹിക്കുന്നുവെന്നുമൊക്കെ കേള്‍ക്കുന്നത്, എന്നും ഏത് പെണ്ണിനും കേള്‍ക്കാന്‍ സന്തോഷമുള്ള കാര്യമാണല്ലോ? പിന്നെ, പരാശരമുനിയുടെ ആഗ്രഹം പോലെ ആവശ്യം അലമ്പുമല്ല!



സത്യവതി ശന്തനുവിനോട് കമ്പ്ലീറ്റ് വിനയവും പുറത്തെടുത്ത് പറഞ്ഞു:



‘എനിക്ക് വിരോധമില്ല. പക്ഷെ, അതോണ്ടായില്ല. ദാശമുഖ്യനായ എന്റെ അച്ഛന്റെ സമ്മതം കൂടെ വാങ്ങിയാലേ വിവാഹം നടക്കുകയുള്ളൂ. അച്ഛന്റെ സമ്മതമില്ലാതെ ഒരു എടപാടിനും ഈ ഞാന്‍ നില്‍ക്കില്ല!’



ശന്തനുമഹാരാജാവ് മുഖം ഒരു വശം കോട്ടിപ്പിടിച്ചുകൊണ്ട് ചോദിച്ചു.

“ഗഡി ഇപ്പോള്‍ എവിടെയുണ്ട്?“



“വീട്ടിലുണ്ട്. കടു കുത്തി രണ്ടു ദിവസമായി റെസ്റ്റിലാണ്”



ശന്തനുവും സത്യവതിയും ദാശമുഖ്യനെ തേടി വീട്ടിലേക്ക് നടന്നു

10 comments:

  1. പൂനം ദാസ് ഗുപ്തയെ വിടില്ല അല്ലെ?
    :)

    ReplyDelete
  2. കസ്തുരി കൊണ്ട് ഒള്ള ഓരോ കൊഴപ്പങ്ങളെ....

    ReplyDelete
  3. ksha santhoshayi ...blog vannallo...

    ReplyDelete
  4. കൊള്ളാം അണ്ണാ.....ചാറ്റില്‍ വാ, ബാകി സ്റ്റോറി പറഞ്ഞു തരാം....

    കോഴിമുട്ട, പൂനം ദാസ് ഗുപ്ത ഇതൊന്നും വിടാന്‍ യാതൊരു പ്ലാന്നും ഇല്ലാ അല്ലെ ??

    ReplyDelete
  5. കലക്കീട്ടാ ചുള്ളാ.

    ReplyDelete
  6. നന്നാവുന്നുണ്ട്..പക്ഷേ ഒരു കാര്യം പറയാതെ വയ്യ, കൊടകരപുരാണത്തിന്റെ എവിടേം എത്തുന്നില്ല ഇത്..പുരാണം മൊത്തം തീര്‍ന്നോ?

    ReplyDelete
  7. അവതരണം അതി മനോഹരം.

    :)

    ആശംസകൾ

    ReplyDelete
  8. മഹാഭാരതകഥ പണ്ട് തുടങ്ങിയപ്പോള്‍ ഏതോ വിവരം കെട്ടവന്‍ കയറി ഉടക്കിയതിന്റെ ഒരു പിടുത്തം മാഷിതുവരെ വിട്ടിട്ടില്ല. ആ പിടുത്തം ഇല്ലാതെ അങ്ങോട്ട് അഴിച്ചു വിട്ടേ സംഗതി.

    പണ്ടു സുകുമാര്‍ ശിവപാര്‍വതിമാരെ നന്നായൊന്നു വാരിക്കഴിഞ്ഞ് അങ്ങുമുകളിലുള്ളവരെ ഓര്‍ത്ത് നന്നായൊന്നു ചിരിച്ചത് http://www.jesusandmo.net/2009/08/03/means/ ദാ ഇതൊക്കെ കാണുമ്പോഴാരുന്നു.

    മാഷിതൊന്നു ടൈറ്റാക്കിയാല്‍
    തകര്‍ക്കാം..

    ReplyDelete
  9. പരിചാരകര്‍ ആരെങ്കിലും നിര്‍ബന്ധിച്ചാല്‍ മറുപടിയായി “എന്നിട്ടെന്തിനാ??” എന്ന ദൈന്യതയോടെയുള്ള ചോദ്യമാണ് മുഖത്ത്!

    :))))


    വിശാല മനസ്ക്കാ... എന്തോന്ന് ഇതു ? കിടു

    ReplyDelete
  10. "ശന്തനുവും സത്യവതിയും ദാശമുഖ്യനെ തേടി വീട്ടിലേക്ക് നടന്നു.."
    എന്നിട്ട്?..

    ReplyDelete